Тус сумын хүн амын үндсэн хэсэг нь Элжгэн Халхууд бөгөөд Элжгэн овог нь хамаг монголын ханлигийн Дарлигин хэмээх хэсэгт нь хамрагдаж байгаад Чингис хааны анхны 13 хүрээний нэг болж байжээ. Улмаар Батмөнх даян хааны отгон хүү Гэрсэнз Жалайр хунтайжийн хоёрдугаар хүү ноёнтой Хатанбаатарт Бэсүд ба Элжгэн нарыг өгч захируулжээ. XVIII-р зууны төгсгөл хүртэл Халхын баруун гарын дайчин Хатанбаатарын отог гэгдэж явав. Бадма дайчин Хатанбаатарын үед Бэсүдээс салж бие даасан отог болов. Манжийн хожуу үед Засагт Хан аймгийн Ачит вангийн хошуу гэж нэрлэгдэж байгаад 1923 онд Хантайшир аймгийн Ханхөхий уулын хошуу гэж нэрээ өөрчилж байжээ.